رواية تجربه طلاقي كامله بقلم هويدا زغلول

احمد _
نسيت اقولك انك تفردي وشك وانتي داخله تطمني عليها زي ما بتقولي، ومتنسيش تباركيلها اصلها حامل وهنرجع لبعض قريب..

اتصدمت اميره وقالت _
اييه حامل..

احمد بحده _
ايوه وان شاء الله اول حاجه هعملها لما مراتي ترجعلي هخليها تقطع علاقتها بيكي وباي حد ممكن يبعدها عني..

_قال كلامه واخد عربيته ومشي راح لبيت صلاح صاحبه، واميره طلعت فوق عند بسنت واول ما دخلت قالتلها بسنت اللي كانت بتبكي..

بسنت _
الحقيني يا اميره شوفتي الحيوان احمد عمل ايه طلبني في بيت الطاعة وانا طلعت حامل شوفتي الكارثه..

شرين بضيق _
لا كارثه ولا حاجه دي اشاره من ربنا عشان تعقلي وتهتمي ببيتك وجوزك وتكبري دماغك من اي حد عايز يخرب عليكي..

ام بسنت بحده _
انتي اتجننتي يا شرين عايزه بسنت البرنسيسه بسنت تسمع كلام الجربوع ده، متقولو حاجه يا بنات..

سندس بتوتر قالت _
ااا انا بصراحه حاسه ان كلام شرين منطقي اكتر، واحمد لو وحش مكانش اتمسك بيكي يا بوسبوس اكتر من كده..

اميره بغيظ قالت _
لا طبعا ده كلام نتيجته هتيجي بالعكس علي بسنت، كفايه امها هتخلف وهيبقي عندها بيبي تخيلي كده يا بسنت يبقي عندك بيبي وعايشه مع احمد اللي طلبلته ما بتخلص ده مش بعيد يدخل عليكي بوحده متجوزها ويقولك عشان انتي خلفتي وشكلك بقي وحش..

اتعصبت شرين وردت عليها وقالت _

انتي بتقولي ايه يا اميره احمد مستحيل بعمل كده. ده بيعشق بسنت، وبعدين كان عمل كده من دلوقتي...

اميره بخبث _
الله واعلم عايز يطلع بايه من وراكم يا شرين او ياخد ايه، اصل هو بعد ما خانها هيتمسك بيها اووي كده ليه...

بسنت ببكاء _
اميره معاها حق علي فكره، بابي اتصرف انا مش ممكن ارجعله..

ابو بسنت بضيق _
للاسف انتي لازم ترجعيله يا بسنت القضيه بتاعتك خسرت وهو طلبك في بيت الطاعه ومفيش في ايدنا حاجه نعملها غير انك ترجعي وتقولي حاضر ونعم للحيوان ده..

اميره بغيظ وحقد _
يعني ايه هتسيب بنتك تتبهدل عنده يا عموو...

ابو بسنت بضيق _
هي بس ترجع دلوقتي وبعدين ليها الف حل المهم متحصلش فضايح..

ــــــــــــــــــــــــــــــــــــــــ

_في بيت صلاح صاحب احمد كان احمد قاعد مدايق، وطلع صلاح من المطبخ وحط اللكل علب السفره وقال..

صلاح بهدوء _
تعالي يا ابو حميد جهزتلك العشا، شوية مكرونه بالصلصه يستاهلو بوقك...

احمد بضيق رد عليه وقال _
لا مليش نفس يا صلاح كل انت متشغلش بالك بيا...

راح صلاح وقعد. جنبه وقال _
ريح نفسك يا احمد انت معملتش حاجه غلط، انت واحد بيحافظ علي بيته وعايز يرجع مراته وابنه..

اتنهد احمد وقال _
اوقات بقعد. مع نفسي واقول انا غلطت في حقها خونتها والستات بتتوجع من الخيانه، وبعدين برجع واقول دي خطه منيله بنيله من واحد خراب بيوت زيك..