النعمة كاملة

ومشينا ليها طوالي عملوا ليها فحوصات تاني وكانت النتيجه انه نوع السړطان العندها حاد ومحتاجه عملية زراعة نخاع شوكي ولازم قبل العمليه تاخد جرعات كيميائي مكثفة عشان جسمها يكون مهيأ للعمليه وطمنونا انه بعد العمليه ح تستعيد عافيتها تدريجيا وتكون كويسه ما اكذب عليهم نحنا خفنا من موضوع العمليه لأنه النعمه صغيره وجسمها ضعيف يمكن م تتحمل بس كمان ما بنقدر نخليها تتعذب كدا مع العلاج الكيميائي وبالذات هو ما جايب نتيجه معاها فخلاص وافقنا على العمليه بس تكلفتها كانت عاليه جدا وكمان الجلسات المكثفة برضو غاليه زائد مصاريف الايجار والأكل والشراب ونحنا القروش المعانا ما كانت بتكفي فقرر ابو النعمه يفتش شغل عشان يقدر يكمل قروش العلاج والعمليه بقي كل يوم يطلع يفتش ويرجع بدون فائده كل يوم على نفس الحال لحد ما طلع يوم الصباح وجا راجع المساء قال لقاء شغل في مصنع شغل متعب شويه بس الراتب كويس ح يساعدنا نكمل رسوم العمليه فرحت شديد وبقينا نحسب ح يصرف كم وح نقدر نوفر كم وسرحنا في احلامنا انه خلاص النعمه ح تعمل العمليه وح نرجع بيها السودان بي صحتها وعافيتها وح نبدا حياتنا من الصفر ونشتري بيت جديد ونعمل فيهو دكان ونمنا على كدا هو بقى كل يوم يمشي المصنع الصباح ويرجع المساء وانا متابعه مع النعمه جلسات الكيميائي لحد ما خلاص حددوا لينا العمليه كان قروشنا ناقصه برضو بس ابو النعمه قال هو اتكلم مع مدير المصنع وشرح ليهو ظروفو وطلب منو سلفيه عشان يقدر يكمل بيها المبلغ وقال انه المدير وافق ليهو وبكره ح يستلم السلفيه من الحسابات انتظرنا يوم بكره بفارغ الصبر وهو مشى الشغل بدري شديد ومفروض يرجع المساء عشان نمشي نسلم باقي المبلغ بتاع العميله بس قبل ما يرجع اتصلوا علي من المصنع وقالوا لي البقاء لله حصل انفجار في المصنع وابو النعمه اتوفى