النعمة كاملة

كنت بقول ليها ح ازعل منك لو ما عملتي الحاجه دي لكن هسه ما قادره اقول ليها كدا ما عايزه اضغط عليها في حاجه وانا كمان والله ما عايزه نمشي الدكتور وما عايزه اعمل حاجه هي ما بتحبها لكن مرات بتكون مجبور تعمل حاجه طفلك ما بحبها بس عشان مصلحتو هي بقت تبكي وقعدت في الأرض ما عايزه تمشي إلا ابوها شالها بالڠصب وهي پتبكي وصلنا للدكتور كنا حاجزين اصلا يلا الدكتور اول ماشاف النتيجه بقى يمهد لينا ويقول دايما ربنا ببتلي الإنسان في أحب شي ليهو عشان يعرف مقدار صبرو وانه هسه العلم اتطور وكل حاجه عندها علاج انا بقيت ما قادره اسمع باقي الكلام وما فاهمه أي حاجه شبه ما واعيه كدا بالجد الصدمه كانت أكبر من اني اتحملها يا جماعه كيف النعمه يطلع عندها سړطان في الدم كيف وهي ياداب عمرها ٤ سنوات وما شافت للدنيا شي وهي ما بتعرف سړطان زاتو يعني شنو ابوها بقى يهدي فيني وقال لي نحنا صبرنا ١٧ سنه عشان ربنا يرزقنا بيها اكيد ح نصبر لحد ما يشفيها لينا وح نسافر ونشوف اشطر دكتور ونعالجها هو بيحاول يصبرني بس عيونو مليانه دموع قبيل لما طلعنا من البيت هي كانت پتبكي وهسه رجعنا كلنا بنبكي والبيت بقى مليان ريحة حزن بعد ما كان مليان فرح بوجودها

رغم الحزن والضعف العشناهو كان لازم نقوى ونبدأ معاها مرحلة العلاج في النهاية البكاء والحزن ما ح يغيروا حاجه ومهما حصل نحنا لازم نقوى عشان نقويها ونصبرها ونديها أمل فبدينا معاها العلاج وبقينا نعيش كل يوم أسوأ من اليوم القبليهو عموما العلاج الكيميائي دا أسوأ حاجه ممكن يمر بيها الإنسان فما بالك لو كان طفل فهي كانت كل يوم بتتعب اكتر وجسمها بيضعف لحد ما شكلها اتغير وشعرها الكنت بسرحو ليها كل يوم بقى مافي ونفسيتها تعبت شديييد ونحنا كمان تعبنا معاها نفسيا وجسديا وماديا العلاج كان مكلف شديد ونحنا وضعنا ما كعب بس برضو ما على قدر كدا ابوها باع الدكان بي بضاعتو عشان نقدر نواصل ليها في العلاج وانا كمان كان عندي خاتم دهب صرفتو واستمرينا على الحال دا سنه كامله ولسه الحال زي ماهو وماشي لي أسوأ فالدكتور اقترح علينا نمشي مصر ونحنا اصلا ما كان عندنا خيار تاني عشان نفكر فخلاص قررنا نسافر مصر بس المشكله كل القروش المعانا صرفناها على العلاج فبقينا في هم القروش اضطرينا نبيع البيت وجزء كبير من الأثاثات واتوكلنا على الله وسافرنا وكلنا امل اننا نرجع بيها طيبه ومليانه عافيه وصلنا مصر ونحنا ما بنعرف حاجه هناك أجرنا شقه صغيره كدا قعدنا فيها وسألنا عن احسن
مستشفى لعلاج السړطان